關智斌(Kenny)主演嘅內地古裝喜劇《拜見宮主大人》上一季收視報截,大結局一集更達到4.7億播放率,收視口碑大受好評,投資方決定添食開拍第二季,劇集去年完成拍攝,日前喺北京舉行發佈會,主角關智斌着住格仔西裝官仔骨骨現身。
發佈會上,Kenny同女主角孫雪甯battle普通話急口令,Kenny話唔會俾現場觀眾「食花生」,不過講咗冇幾耐,佢條脷就打晒結,全場爆笑。除咗玩急口令,Kenny仲喺台上帶領大家齊齊跳劇中佢劇中會跳嘅「蘿蔔舞」,騎呢舞步令到在場再次爆笑,不過Kenny完全唔介意,仲話:「豁出去了!」而睇住直播嘅網民都紛紛留言話:「Kenny真實地太可愛。」Kenny亦透露今季劇情更加精彩,「我飾演的魔王秦斬從一個武功高強的任性大男孩,成長到了一個買菜、織毛衣、做甜點,一個住家好男人的狀態,角色與上一季完全反轉,搞笑無厘頭升級。」