ViuTV播出《鋒味前奏》第三集,今次謝霆鋒教大家整甜品:捷克特產-煙囪卷。佢話自己去捷克時試咗呢個捷克名物,但食完覺得好硬、好韌,所以返到香港就將煙囪卷改良,將佢變得更脆更鬆軟,佢亦將做法簡化,喺屋企都可以做到。將酥皮捲成煙囪卷後,佢哋就準備打Cream做煙囪卷嘅內餡,雖然火火積極幫手打Cream,但打極啲Cream都無乜起色,霆鋒忍唔住自己落返手,果然一落手啲Ceam就成功發起,劉翁大讚:「師傅左右手都打得喎!」
見暫時無嘢幫到手,火火就問霆鋒人生入面食過最怪嘅食物係乜,不過佢就先自誇幾乎食遍所有怪食物:「曱甴、老鼠、龜我都食過。」劉翁都不甘示弱話自己曾經去四川做慈善活動,食過當地嘅麻鷹湯,初頭誤以為係雞湯嘅佢都得知真相後嚇一跳!呢個時候,霆鋒就拎咗自己個電話出嚟播片,片中影住G.E.M鄧紫棋食蜘蛛,原來其中一集《鋒味》佢同G.E.M去咗柬埔寨食新鮮炸昆蟲,真係見到都得人驚,霆鋒話:「嗰度真係一隻隻蜢、一隻隻蜘蛛就攞出嚟就食㗎啦!」講到古怪,霆鋒即刻秒殺火火同劉翁。