歷時三個月,今季《鋒味》日前播出最後一集,壓軸嘉賓就係周杰倫。六年前,二人拍攝電影《逆戰》飾演兩兄弟,今次佢哋就喺東京上演《逆戰》續集,周杰倫化身導演,節目一開始,就嚟一場「兄弟重逢」嘅戲份,周杰倫係咁嗌cut,跑到霆鋒上氣唔接下氣, 十分搞笑。除咗整蠱霆鋒,既然係最後一集,周杰倫講到明今次要霆鋒帶佢去「沒有吃過的」美食,實行要俾啲難度佢咁話。
喺霆鋒安排下,佢哋去品嚐由九十三歲、有「壽司之神」之稱小野二郎所整嘅壽司。小野二郎係日本地位最高嘅廚師,「壽司之神」稱號聞名全球。佢嘅壽司店,連續兩年獲評「米芝蓮三星」殊榮。食過「沒有吃過的」美食後,霆鋒就話介紹自己嘅「新女友」俾周杰倫識,去到band房,周杰倫就知道原來新女友就係新結他,佢即刻問:「有沒有人看過?先講!」霆鋒話冇,然後周杰倫就說出重點來,「這個很重要,昨天也是吃沒有人吃過的,我就要跟其他來賓不一樣。」打開結他盒,一睇到結他身係一個女神雕像,周杰倫忍唔住話:「這個太誇張了吧。」霆鋒一邊拎出結他一邊講:「這個師傅做了三年,沒有怎麼出過房間門口,一直雕這個東西。我們都是希望給觀眾帶來最想像不到的經歷嘛。」
之後霆鋒就話聽講周杰倫識得用食物玩音樂,然後就拎蘋果香蕉同菠蘿出嚟俾周杰倫彈琴,佢用香蕉彈《青花瓷》,霆鋒拍晒手咁話:「好一首《香蕉瓷》。」彈完後,周杰倫沾沾自喜咁話:「可以來個難一點嗎?這個太簡單了。」然後用菠蘿彈出霆鋒嘅歌曲《舊傷口》,聽到霆鋒都忍唔住唱番兩句。而同樣係結他迷嘅日本留學生青空,為咗學好音樂,離鄉別并去到東京,為咗鼓勵青空勇敢追夢,霆鋒同經理人霍汶希為佢整咗一道創意十足嘅冰箱料理;而周杰倫則錄咗一段暖心video送俾佢,真係睇到人好感動。
今季《鋒味》唔單止連續十二期榮獲美食類節目冠軍寶座,而且仲頻頻登上微博熱搜,絕對係口碑載譽。《鋒味》已經拍到第五年,一路走來,謝霆鋒感受到自己嘅成長:「我不是一個容易妥協、滿意的人,第一年的時候,稍微有一些東西不在軌道和預期上,我就會發飆。但現在的我,已經懂得了變通,包容度也更大了,廚房現在已經變成了我的修行地,我喜歡廚房裏的一切聲音。」