容祖兒2019年全新廣東主打歌《一種永遠》MV今日(19)出街。今年係祖兒入行二十周年,佢希望透過全新歌曲迎接今年年中嘅演唱會。《一種永遠》正正呈現祖兒當下嘅心態,特別喺歌詞方面,令祖兒回想起堅持二十年嘅夢想歷程,「喺呢個過程裏面要經歷過唔同嘅磨練、長大,都係唔容易,我唱呢首歌嘅時候都係有一種激情,同埋希望自己可以飛得更加遠、更加高的感覺。」

 

MV於台灣拍攝,導演搵嚟曾奪得台灣金曲獎「最佳音樂錄影帶獎」嘅比爾賈操刀,佢希望祖兒有一個「超現實」嘅演繹,而祖兒就希望出嚟嘅效果除咗畫面靚,仲會以一個故事形式帶出佢一路走來嘅經歷,祖兒話:「導演諗咗個超現實嘅故事、一啲穿越嘅感覺。MV一開始有個小妹妹,喺好耐以前灌溉一個音樂嘅種子,將好多心機、心血擺喺泥土入面;而我係未來嘅人,回到過去,然後就同個小妹妹有啲交流。」

拍攝當日,祖兒除咗要着住一件重量級嘅珠片衫,仲要全身搽滿閃粉,搞到佢成個人硬晒,佢笑說自己好似一隻着咗鞋嘅狗仔,「因為我要黐啲閃粉落去兩條手臂,好『立』,好多唔同層次嘅閃粉,個頭又落咗好多gel,條裙又好硬,所以我而家就好硬,哈哈。另外仲有一個shot好似驗眼,又係要我成個人硬晒定晒,哈哈。」拍完第一個shot後,祖兒已經勁感動,仲話回憶番晒嚟㖭,「導演安排咗一個好大嘅圓台,其實個圓台係一個LED mon,佢將我咁多年嚟嘅一啲經典MV放咗入去,因為我呢隻歌係希望帶出一種回顧、亦都係對一種未來的展望的一種心情,所以拍攝嘅時候佢播一啲舊嘅片段,當我見到呢啲片段時,腦裏面諗起好多好懷念嘅畫面,好感動。」祖兒仲話除咗件衫有啲重同閃粉搞到硬晒,其實個MV都拍得幾舒服,「好多時候都係坐喺度、瞓喺度甚至乎最大嘅動作只係打開隻手。不過導演一個好精心嘅設計令我好震撼,好完美咁將我想要嘅畫面呈現咗出嚟,好多謝導演嘅安排,我都好期待呢個MV。」