因為參加內地選秀節目而爆紅嘅許靖韻(Angela)日前於廣州中央車站展覽廳舉行第一個賣飛音樂會《Angela First Tour 廣州站》,近千人嘅場館全場爆滿。
近兩個鐘嘅演唱會以歌會友為主,當晚Angela換咗兩套衫,除咗騷唱功,仲大晒音樂才華,一口氣用鋼琴自彈自唱四首歌。Angela話音樂會前期待之餘又緊張,「喺廣州第一次有自己賣飛的音樂會,開show之前好緊張,但係又冇乜時間緊張,因為前後得兩個星期去準備成個音樂會,排練、諗歌、度rundown。一路都冇特別去諗過自己可以有賣飛嘅音樂會,覺得呢件事好似等咗好耐、好期待,然後又好快就發生。」
第一次開show,Angela話有好多難忘事,當中對觀眾嗌encore印象特別深刻,「其實之前都冇特別諗encore嘅嘢,到真係on show時,我都未唱完,啲觀眾已經嗌encore。其實之前隊band都有問過,如果啲人唔嗌encore咁點?哈哈。所以係好開心,喺我未唱完嘅時候就嗌encore,同埋覺得好搞笑。」而歌迷嘅支持亦令Angela好感動,「我知道有好多fans係特登買機票飛過嚟睇我第一個音樂會,又要book酒店,呢樣嘢我已經覺得好不可思議,同埋好感動。」佢仲話要特別多謝陳芳語同吳香映嘅fans,「因為佢哋嘅fans都有送花籃過嚟,真係好開心咁多人支持。」除咗親身到場支持,fans亦做咗好多心思嘢,「我一入到去化妝間,就已經見到擺滿晒佢哋送嘅粉紅色蛋糕、枱布都係粉紅色、氣球都係粉紅色,全部嘢都係粉紅色,佈置咗一個好靚嘅化妝間俾我。會場門後,佢哋擺咗好多花籃、好多可以俾人打卡嘅相框,做咗好多好有心思嘢。之前fans話如果我開show,佢哋一定會為我準備一個粉紅色嘅海,即係佢哋會拎住粉紅色嘅燈棒。音樂會當晚我真係見到呢個粉紅色嘅海,但好搞笑嘅係,個粉紅色嘅海,去到音樂會尾聲時有啲冇電,哈哈哈。」