古巨基新歌MV《亂世情侶》噚日(8日)出街,曲詞分別由陳輝陽及林夕呢對「夕陽」組合包辦,歌曲反映香港嘅現實社會,情侶們要節衣縮食,為口奔馳,日忙夜忙,就連少少濃情蜜意都好易被消磨。但快樂,就係喺每日喺微小生活事上發掘,就算現實逐吋逐呎擠壓當初情意,也要做對仍信愛情沒有輓歌「亂世情侶」。
今次MV女主角就搵嚟基仔老拍檔胡定欣演出,二人對上一次合作原來已經係十四年前,當時胡定欣就為基仔《愛與誠》MV任女主角。講起往事,佢哋兩個都互笠高帽,大讚對方完全冇變過,基仔同胡定欣講:「好特別呀個感覺,我哋頭先傾偈,都話眨吓眼就過咗咁多年。所以可以再邀請你嚟拍我嘅MV,我係非常開心。佢拍劇時間好忙,好耐冇為人做MV女主角,所以我喺度要特別多謝佢。好多人所講嘅『回憶剎』,我諗我哋今次再拍mv就係喇。」
MV講述一對情侶大家為咗儲錢計劃結婚,各自忙碌工作令感情生活麻煩,女方返office經常OT、男方就係倉務員返通宵班,睇落好似一齊計劃將來,但係其實忘記咗身邊嘅人。最後有所領悟的基仔跑去胡定欣公司搵佢,一個touching嘅結局。基仔話:「為咗計劃將來,但忘記咗而家,忘記咗兩個走埋一齊嘅最初意義,所以呢隻歌加埋呢個故事,係一個愛情上幾大嘅感觸嘅故仔。」胡定欣亦有感而發,「唔單止係返office工有咁嘅情況,其實我哋做呢行都係,冇日冇夜,好多好重要嘅moments或者好似首歌講嘅人與人之間最緊要嗰樣感情、過程中緊扣嘅感覺缺乏咗。」
喺office拍攝仲勾起咗胡定欣入行前嘅回憶,「我做過兩年秘書先至入行,同埋覺得返office呢件事好貼地呀,哈哈。」而今次拍攝MV,係胡定欣「出山」之作,「我舊年五月做完舞台劇之後,就冇做過戲啦!所以今日係我第一日返工,哈哈。我頭先都覺得係時候pick up番。」
除咗唱同演,今次MV亦由基仔親自執導,喺拍攝過程中提供唔少指導,每拍完一個shot,基仔都會走到鏡頭後睇playback,十分認真,胡定欣話:「基仔解說MV故事時解釋得好詳盡,今朝喺車上面聽佢講時,我已經好有畫面、好感動,可能因為人大咗、或者經歷多咗,對呢啲事會好感受到。」基仔亦不忘大讚胡定欣演技一流,「定欣當年幫我拍完《愛與誠》後,一直努力拍劇甚至兩奪視后,絕對係好戲之人!有好多場戲定欣都係一take過,而且有幾個位我都睇到眼紅紅。」