今個月22號生日嘅阿Sa蔡卓妍,雖然已經過咗生日成個禮拜,不過佢仲有生日會、仲有生日蛋糕砌,而呢個「遲來的生日會」仲要喺好多小朋友夢寐以求嘅McDonald’s搞添。
繼之前個生日蛋糕蠟燭俾好友容祖兒「搶吹」,自己吹唔到後,今次阿Sa終於有樣係自己話事,就係安排自己嘅生日會,「生日會係自己安排,因為我細細個就好想喺McDonald’s搞生日會,但係到咁大個都冇試過,所以今年我就特別安排咗俾自己。」可以喺自己一直想搞生日會嘅地方開Party,原來真係會開心啲,「決定搞呢個生日會,其實係一個禮拜內嘅事,因為之前一路拍戲,冇諗過咁短時間、同埋喺禮拜四都有咁多fans協調到時間過嚟同我慶祝。仲有就係細細個好羨慕啲同學喺McDonald’s開生日會,覺得McDonald’s 有魔力,真係好開心。」
生日會上,阿Sa拎住個用氣球扭成嘅手袋滿場飛,原來係餐廳方面特別送上嘅氣球「包包」,阿Sa話:「好勁呀用氣球扭手袋,勁靚,我好鍾意呀。」問到生日願望,阿Sa就話:「希望今年可以繼續做自己鍾意做嘅嘢,同埋身體健康。」